Dak Asi Bantut Peleser ke Pantai Pasir Padi, Men Ikak ke Pangkalpinang Mlanyah Dak Singgah ke Sine

Budak-budak ingen e mintak ampon sambil begagil ngirup kelapo mudek di bibir Pantai Pasir Padi Pangkalpinang (babel.indozone.id/khamelia)

BANGKA BELITUNG -- Sepradik, men ikak urang bangkek, pasti suah umun gi ke pantai Pasir Padi. Pantai ne imang favorit, gati lah pukok e dipereh kek urang Bangkek, ape agik urang yang tinggel di pengkal, karena jarak e geh deket umun cumen kurang lebih 8 kilometer nak ya lah men ditempoh naek uto atau mutor.

Ngape urang ingen ke pantai ne? karena ombak e tenang dibanding kek pantai laen yang ade di Bangkek ne. Budak sekuayok maen aek, tapi jangen lingah ulik ok, tetep nek diperati budak maen di aek, dek kawah jorang terlena sampek maen ke tengah laot, mak kek pak nek ingah umun beperati kek budak.

Sepradik, ko merik tau kek ikak, pantai ne panjang e 300 meter, warna paser e puteh nyelepok, men diijek paser e kerase padet. Maka e pantai ne dijadikan kawasan pariwisata potensial kek Pemerintah Kota Pangkalpinang.

Baca juga: Kamus Bahasa Bangka, Uniknya Beda Kampung Beda Pula Logat dan Aksen

Men akhir pekan ne jangen ditanyak ramai umun urang pegi ke pantai, ape agik pas aik tengah surot, ingen umon budak maen aik di siya. 

Sepradik, men ikak laper dek payah becarik pemaken, sejejer pantai ya betambun urang bejuel, cem bakso, kelapo mudek, pempek, pukok e ikak dak kelaper asak maen ke sine, asal bawek duit geh nyamen belanje. 

Men sekire ikak bekantong tebel sudeh e kerenyek maken seafood, dak payah, tinggel pere ke restoran yang lah terkenal di Bangkek ne, salah satu e Resto Aroma Laut, maken di siya serase maken dalem kapal laot, resto e di desain mirip kapal.

Soal menu sekuayok pileh, macem-macem seafood ade gale. Men nanyak harge, ko dak tau geh, ikak kire-kire bai, jangen sampe bawek duit ngepas, nyarik merawak ikak.

Men amang-amang hobi muket, jangen lupak ikak mawak jale, men tengah beruntung pacak lah dapet ikan kecit-kecit, udang kek ketem, tapi kebanyakan anek e, men nek dapet ikan besak gi mancing biase e.

Nah, cemtu lah sikit kisah Pantai Pasir Padi, men ikak warga luar Bangka Belitung yang penasaran, jangen lupak singgeh ke sini ok.